İsveçrə frankının digər valyutalar qarşısında məzənnəsi kəskin şəkildə artmaqdadır. Valyuta bazarlarındakı hazırkı yüksək dalğalanma şəraitində frankın sığınacaq valyuta statusu investorlar tərəfindən bu valyutaya qarşı tələbin artmasına şərait yaradır. Qeyd edək ki, ABŞ-ın yüksək dövlət borcu və Standard & Poor's agentliyi tərəfindən bu ölkənin kredit reytinqinin aşağı salınması fonunda frankın dollar qarşısında məzənnəsi bu ayın əvvəlindən 16% yüksəlmişdir. Maliyyə bazarlarında qeyri-stabillik yarandığı vaxtlarda ənənəvi olaraq dollara qarşı da tələbin artmasına baxmayaraq hazırkı durumda investorlar üçün əsas sığınacaq valyutası frank və yenadır. İsveçrə MB isə frankın məzənnəsində kəskin məzənnə artımının ölkənin ixrac potensialına göstərdiyi mənfi təsirinin qarşısını almağa çalışır. Bunun nəticəsi olaraq qurum çərşənbə axşamı verdiyi bəyanatında valyuta bazarlarına intervensiya etmək niyyətində olduğunu açıq şəkildə bildirmişdir. Lakin buna baxmayaraq elə həmin gün frankın dollar və avro qarşısında məzənnəsi 5% yüksəlmişdi. "Frankın məzənnəsi hədsiz yüksəlmişdir və bu deflyasiya təzyiqlərini artırmaqla İsveçrənin iqtisadi inkişafına təhlükə yaradır"- Mərkəzi Bankın hesabatında qeyd edilir. Mərkəzi Bankın faiz dərəcələrini 0 səviyyəsinədək endirməsinə baxmayaraq frankın məzənnə artımının qarşısını almaq mümkün deyil. Çərşənbə günü İsveçrə Mərkəzi Bankı yenidən verbal intervensiya etməyə çalışmış, lakin bu tədbirlər uğurlu olmamışdır. EUR/CHF məzənnəsi ticarət sesiyasının 1.025 minimum səviyyəsi ilə müqayisədə 1.035 səviyyəsinə geri dönmüş, USD/CHF məzənnəsi isə 0.7069 səviyyəsindən 0.7299 səviyyəsinədək yüksəlmişdir. Hazırda valyutanın bazardakı mövqeyini İsveçrə Mərkəzi Bankı deyil Avropa Mərkəzi Bankı və FRS müəyyənləşdirir. Avrozonada borc problemləri artır. Birləşmiş Ştatlarda da bu sahədəki gərginliklər artmaqdadır. İnvestorlar dünya iqtisadiyyatındakı durumla bağlı çox narahatdırlar. Bazarda risk maraqlarının aşağı olduğu bir vaxtda bu franka qarşı tələbi artırır.
