Avropa Birliyi tərəfindən qəbul edilən embarqo qərarının ardından İranın Britaniya və Fransız şirkətlərinə neft ixracını dayandırmasından sonra bazar ertəsi Brent markalı neftin qiyməti 8 aylıq maksimum səviyyəsinə yüksəlmişdir. Çin və Yunanıstanla bağlı dərc edilən xəbərlər isə neft qiymətlərinə əlavə müsbət təsir göstərmişdir. Beləliklə, dünənki ticarət sesiyası ərzində Brent markalı neftin qiyməti hər barrelə görə 121.15 dollar səviyyəsinədək bahalaşmışdır. Qeyd edək ki, bu ötən ilin iyun ayından etibarən ən yüksək səviyyədir. ABŞ-da da neft qiymətləri ciddi artımla hər barrelə görə 105.44 səviyyəsinədək yüksəlmişdir ki, bu da ötən ilin may ayından etibarən ən yüksək səviyyədir. Bütün bunları nəzərə alaraq JP Morgan Chase Brent markalı neftin 2012-ci ilin sonu üzrə qiymət proqnozlarını 6 dollar artımla 118 dollar səviyyəsinədək yüksəltmişdir. 2013-cü il üzrə proqnozlar isə 121 dollar səviyyəsindən 125 dollar səviyyəsinədək artırılmışdır. Qeyd edək ki, İran, Suriya, Sudan, Nigeriya kimi dövlətlərdəki geosiyasi problemlər neft tələbatını artırır.
