Əksər analitiklərin fikrincə AMB-nın hazırkı rəhbəri Mario Draqi bu ilki fəaliyyəti ilə J.K.Trişeni deyil, daha çox B.Bernankeni xatırladacaqdır. Avrozonada böhranın ikinci mərhələsinin başlaması ehtimalını nəzərə alaraq AMB faiz dərəcələrini 1% səviyyəsindən də aşağı sala və beləliklə yerli banklara balanslarını artırmağa şərait yarada bilər. Qeyd edək ki, ötən ilin noyabr ayında M.Draqi AMB rəhbərliyinə təyin olunduqdan sonra Avrozona banklarının toplam balansı 17% yüksəlmişdir. Bu cür siyasət J.K.Trişenin fəaliyyətindən kəskin şəkildə fərqlənir. Bank of America Corp. və Jefferies International Ltd. analitiklərinin fikrincə M.Draqi attığı addımlarla daha çox B.Bernankeni xatırladır. "Trişe və Draqinin fəaliyyət prinsiplərində kəskin fərqlər var. Draqinin atdığı addımlar Bernankenin iş üslubuna daha yaxındır" - Bank of America Merrill Lynch Avrozona üzrə baş iqtisadçısı Lourens Bun bildirir. AMB tərəfindən faiz dərəcələrinin aşağı salınması ilə bağlı perspektivlər EURUSD məzənnəsinə mənfi təsir edə bilər. UBS valyuta strateqi Bit Ziqentalerin fikrincə valyuta cütündə müşahidə edilən nisbi artıma baxmayaraq EURUSD məzənnəsi 2012-ci ili 1.25 səviyyəsində başa vuracaqdır.
